Vampírur og íslenskur prestur til varnar

Þetta getur ekki verið jákvætt. Það vita það allir að vampírur breyta sér í leðurblökur til þess að koma sér á milli staða. Þetta eru pottþétt ólöglegir innflytjendur sem hafa breytt um ham til þess að blekkja lögreglu og útlendingastofnun. Ég geri ráð fyrir að presturinn hafi skvett vígðu vatni yfir þær. Það ætti í það minnsta tefja þær frá markmiðum sínum. Ég mæli með því að þeir sem eiga líkkistur hugi að þeim og gangi úr skugga um að þær séu tómar. Spegill og kross er auðvita nauðsynlegt þar sem ekki verður endilega hægt að treysta eingöngu á lögreglu vegna niðurskurðar. Þeir sem eiga ekki litla meðfærilega spegla geta nýtt sér speglanir á rúður og jafnvel speglanir í venjulegum rigningarpollum. En það gæti gefið falskt öryggi því þessar óværur eru ávallt skrefinu á undan varðandi gáfur og líkamlega yfirburði.

Út af svona hlutum eigum við að segja okkur úr Schengen samkomulaginu og virkja Dyflinarsamkomulagið.

Leðurblökur fundust á Siglufirði

Héðins­fjarðargöng vit­laus fram­kvæmd

Ég ætla ekki að eyða mörgum orðum um þennan mann en hér eru að minnsta kosti tveir linkar:

• http://www.mbl.is/frettir/innlent/2005/04/12/gunnar_birgisson_hedinsfjardargong_vitlaus_framkvae/
• https://www.facebook.com/lena.matthiasdottir/posts/10205245776639858?fref=nf

Verður gott að búa í Fjallabyggð

Þetta kallar maður gott öryggi

Þessi viðbrögð er það sem ég kalla gott öryggi. Við munum eftir flugvélinni í Malasíu sem fórst. Hefði viðbragðið verið betra þá væri sú flugvél ekki týnd. Ekki það að það hefði bjargað mannslífum, þó það hefði mögulega geta orðið, heldur væri að minnsta kosti hægt að finna líkin svo aðstandendur gæti tekist á við sorgina með viðeigandi hætti.

Orrustuþotu stefnt gegn þotu United Airlines

Sjálfskapað víti Íbúðalánasjóðs?

Ein af ástæðum þess að Íbúðalánasjóður þarf aukafjárframlög er vegna þess að hann á eignir sem skila engum tekjum. Sennilega er það rétt að í sumum tilfellum býr fólk í einhverjum þeirra eigna og borgar leigu fyrir. Hins vegar vita flestir að Íbúðalánasjóður á eignir sem hann vill ekki leigja - eða að minnsta kosti reynir ekki að koma þeim í útleigu. Reglulega eru birtar fréttir af tómum íbúðum hans í miklu magni.

Ég hef heyrt sögur af því að þeir séu að reyna að halda bæði leiguverði og húsnæðisverði uppi. Hvort það er satt eða logið veit ég ekki. Í það minnsta er betra fyrir sjóðinn að leigja íbúðirnar þannig að þær skili að minnsta kosti einhverjum tekjum frekar en að láta þær standa tómar. Það ætti að nægja að leigja út íbúðirnar sem nemur afskriftum þeirra, reglubundnu viðhaldi og kostnaði. Sjóðurinn þarf að sjálfsögðu ekki að leigja út á uppsprengdu markaðsvirði til þess.

ÍLS gæti þurft yfir 9 milljarða framlag

Á Eimskip einhver skip á Íslandi?

Samkvæmt því sem ég best veit þá á þetta óskabarn þjóðarinnar, Eimskipafélag Íslands, ekkert skip skráð á Íslandi. Ef ég hef rangt fyrir mér, getur þá einhver bent á skip sem þeir eiga og er skráð hér?

Í reynd á það víst að vera þannig að það eru engin fraktskip skráð á Íslandi, nema í mesta lagi eitt.

Hvað veldur þessu? Stjórnvöld? Skatturinn? Launamál?

 

Óskabarn þjóðarinnar 100 ára

Eru útfluttar landbúnaðarvörur niðurgreiddar?

Eins og flestir vita þá fá bændur og bændasamtökin einhverja milljarða í niðurgreiðslur eða styrki frá skattgreiðendum. Ég hef heyrt að það sé til þess að styrkja þessar greinar og til þess að halda verðinu niðri.

Nú er búið að vera flytja landbúnaðarvörur, s.s. skyr og lambakjöt, til útlanda og slíkt er stöðugt að aukast samanber þessa frétt.

Er verið að niðurgreiða þessar vörur af íslenskum skattgreiðendum? Ef ekki, hvernig fara bændur að því að sundurskilja framleiðslu sína; það sem er framleitt fyrir innanlandsmarkað og svo það sem er flutt út?

Ég geri fastlega ráð fyrir að bændur séu ekki með þetta aðskilið. Ef svo er, er þetta réttlátt eða er þetta hluti af þróunaraðstoð Íslands?

Skyrmarkaður erlendis tvöfalt stærri

Flugvellir í þéttbýli: Ronald Reagan Washington flugvöllur vs. Reykjavíkurflugvöllur

Þar sem oft er verið að gera samanburð á erlendum flugvöllum innan þéttbýlis og borga þá er ágætt að gera raunhæfan samanburð (1:1). Hér tek ég Ronald Reagan Washington flugvöll sem dæmi og miða við Reykjavíkurflugvöll.

Almennt er leitast við að setja ekki öll eggin í sömu körfu þegar kemur að þjóðaröryggi, en hér á Íslandi er öllu hrúgað á sama stað vegna íhalds- og þægindasjónarmiða.

Það dytti fáum þjóðum í hug að hafa bæði forseta, ráðherra og alþingismenn á brautarenda alþjóðlegs flugvallar. Hvað gerðist ef Boeing 757 þyrfti að nauðlenda úr norðri þegar það væri þingsetning?

Svo er sjaldgæft að eina "alvöru" sjúkrahús landsins sé svona nálægt alþjóðlegum flugvelli. Þar fyrir utan gæti sjúkrahúsið sennilega ekki sinnt stóru flugslysi með góðu móti vegna vanbúnaðar. Það skiptir engu máli hvar á landinu stór alvarleg flugslys yrðu - sjúkrahúsin hafa enga burði til þess að sinna slíku - þau hafa ekki einu sinni burði til þess að sinna þjónustu við borgara miðað við það sem hefur komið fram opinberlega undanfarið.

Ég hélt að það væri liðin tíð að smíða stór skemmtiferðaskip og hafa alltof fáa björgunarbáta um borð eins og frægt varð með Titanic slysið fyrir 101 ári síðan.

Fjölmargar stofnanir ríkisins stóðu í þeirri merkingu

Fyrst þegar ég heyrði af þessum orðrómi um að flugvél frá bandaríska flugflotanum væri að flytja sprengiefni á Akureyrarvöll fyrir Vaðlaheiðargöng, þá fannst mér það auðvita ótrúlegt. Það fer enginn að flytja sprengiefni með flugvél nema þá í hernaði. Aldrei of nálægt byggð nema það sé stríð - sérstaklega ekki á Íslandi.

Það má ekki einu sinni flytja notaða bílavarahluti, sem hafa komist í tæri við eldsneyti, með flugvél.

Fyrir utan það rökrétta í málinu þá hefði það aldrei rúmast innan kostnaðaráætlunar Vaðlaheiðarganga að flytja eitthvað með leiguflugi frá bandaríska flughernum - hvort sem það væri sprengiefni eða varahlutir.

Það sem hins vegar slær mig við þessa frétt er þetta:

Fjölmargar stofnanir ríkisins stóðu í þeirri merkingu

Ef þetta er rétt sem stendur í fréttinni þá finnst mér sinnuleysið hjá þessum ríkisstofnunum vera umtalsvert. Hvaða stofnanir ætli þetta séu? Ég er nokkurn veginn viss um að það hafi ekki verið lögreglan, Almannavarnir eða slökkvilið. Ef þetta hefði verið raunin þá hefðu auðvita allt slökkviliðið verið í viðbragðsstöðu og sennilega flest allir viðbragðaðilar líka. Venjulega er mikið magn af sprengiefni ekki flutt nema í fylgd lögreglu - a.m.k. í þéttbýli.

Í alvöru, hverjum myndi detta í hug að flytja mikið magn af sprengjuefni með flugvél hér á landi?

Herflugvél á Akureyri

Er lögreglan á höfuðborgarsvæðinu sú eina sem lærir af mistökum?

Í framhaldi af síðasta pistli og það sem er búið að gerast á þessu ári varðandi samskipti borgara við lögreglu. Þá hef ég tekið eftir því að lögreglan á höfuðborgarsvæðinu er að taka sig alvarlega.

Þetta er ekki bara vinna á milli 18:00 og 06:00 -> heldur markmið að gera lífið betra fyrir alla.

Ég á vin sem er alltaf að rakka lögregluna niður og það finnst mér ósanngjarnt. Það eru ekki allir lögreglumenn glæpamenn. Ég held að 97,9837% lögreglumanna séu meiri lögreglumenn heldur en lögreglan sjálf.

Hins vegar er alltaf erfitt fyrir alla að líta vel út þegar einhver þarf að fást við fjölmiðla og fjölda fólks - sérstaklega á sama tíma. Jafnvel í rauntíma þegar það eru slys, áflog eða ótímabær andlát í heimahúsum.

Hins vegar ætti á milli stríða að gefast góður tími til þess að rækta tengslin við "viðskiptavini".

Ég tók hér nokkur dæmi hvernig sum lögregluembætti nálgast samfélagið í gegnum Facebook. Lögreglan í Reykjavík byggir sína nálgun á fræðslu og samfélag en hin á ótta og yfirburði lögreglu (með byggingum og tækjakosti).

 

Ríkislögreglustjóri skipi undirmenn sína

Ég rakst á greinina "Ríkislögreglustjóri skipi undirmenn sína" í Viðskiptablaðinu (http://www.vb.is/frettir/95362/) sem fjallar um það að Noregur hefur ákveðið að láta ríkislögreglustjóra sjá um að skipa lögreglustjóra og aðstoðarlögreglustjóra sína. Landssamband norskra lögreglumanna hefur kallað eftir þessari breytingu um áratugaskeið.

Hér á Íslandi er það Innanríkisráðherra (áður Dómsmálaráðherra) sem skipar í þessi störf. Innanríkisráðherra er auðvita pólitískt embætti og þar getur endað hver sem er, sem á annað borð getur boðið sig fram til Alþingis.

Þar fyrir utan eru íslenskir stjórnmálamenn ekki þekktir fyrir að taka ábyrgð á einu eða neinu. Ekki einu sinni ráðherrar.

Þess vegna getur komið upp sú staða að siðlaus, ábyrgðarlaus og reynslulaus ráðherra skipi í starf sem krefst mikillar ábyrgðar, þekkingar og reynslu. Hingað til, að ég held, höfum við sloppið við að lenda í þessari stöðu með ráðningu á lögreglustjórum.

En hvort ætli sé betra?

Að láta ábyrgðalausa stjórnmálamenn ákveða hverjir verða lögreglustjórar í landinu eða ríkislögreglustjóra sem þarf að standa og falla með starfi sínu?

Hér á Íslandi þarftu eiginlega bara að vera í "rétta" flokknum til þess að verða lögreglustjóri eða aðstoðarlögreglustjóri. Þess vegna eiga sumir mjög góðir lögreglumenn aldrei séns á því að vinna sig upp í starfi.

Það getur oft verið gott að fá "nýtt blóð" í annars íhaldssöm störf. Til að mynda finnst mér vel hafa tekist með Stefán Eiríksson, lögreglustjóra á höfuðborgarsvæðinu. Honum, ásamt starfsfólkinu sínu, hefur tekist vel að tengja saman borgara og lögreglu - sérstaklega samvinnu þar á milli.

Starf lögreglumannsins er nefnilega ekki alltaf dans á rósum. Lögreglan þarf oft að sinna dekkstu hliðum samfélagsins, sem flestir sjá bara í bíómyndum eða lesa um í bókum, sem og að sinna öllum slysaútköllum. Svo auðvita að sinna öðrum embættisskyldum eins og að brosa við hátíðlegar athafnir, aðstoða fólk og dýr, ganga erinda sýslumanna, fræða börn um umferðina og fleira í þeim dúr. Með alla þessa flóru er mjög auðvelt að brenna upp í starfi og verða beiskur, þrátt fyrir að sumt bætir annað upp.